Nos di dos siman na Curacao

Riba diadomingo di di dos siman nos a bai wak Seu pero na Banda Bou. Esaki tabata mas grandi cu esun cu nos a wak siman pasa na Suffisant.
E marcha di Seu aki tabata bon organisa y cu hopi ambiente. Nos a mira muchanan di diferente scol, muchanan special, hende grandi y hasta hendenan di edad halto tur tabata gosa den e marcha. Nos por a observa muchanan cu for di chikito ta aprecia nan cultura.
Mi no a mira baricada ni tampoco hende cu ta cana rond, tur ta para na banda ta mira e marcha pasa y gosa di e ambiente.


E prome siman di stage ta tras di lomba. Nos a stage na Berg Carmel College y a haya e oportunidad di por a stage den 4 grupo. Nos a stage dialuna y diamars den grupo 3, diaranson den grupo 6, diahuebs den grupo 5 y diabierna den grupo 8.
Na e scol aki, Berg Carmel College, e maestranan ta ser yama na nan fam den forma di respet. E prome dia di stage nos a keda impresiona con e alumnonan di grupo tres por a traha un dictado cu palabranan dificil na Papiamento, lesa tambe hopi lihe den Papiamento. Nan ta tratando e tema di Naturaleza y e lesnan tur ta draai rond di e tema aki. Nan tin mesa rondo y mesa cuadra,
segun e Ensenansa di Fundeshi, caminda e alumnonan ta sinta den grupo. E scol aki ta scol piloto pa un proyecto di ICT y tur dia e muchanan di grupo 3 y 4 ta haya turno pa traha riba un laptop tanto riba un programa di matematica y programa di idioma. Tur e lesnan den grupo tres ta na Papiamento.

Riba diaranson nos a stage den grupo 6. E maestra ta Hulandes pero e ta papia Papiamento hopi bon. Su lesnan ta hopi bon y tur ta na Hulandes cu excepcion di e les di Papiamento. Segun e maestra den grupo 6 bo ta usa Hulandes pa prepara e alumnonan pa voortgezet y den e klasnan halto nan ta papia Hulandes. Den e klas aki nos por a presencia un les di Papiamento for di metodo "Papiamento nos idioma" cu ta un methodo cu diferente ehercicio y tarea cu ta atrae e atencion di e alumnonan.

Diahuebs nos a stage den grupo 5. Nos por a sigi e maestra su lesnan cu por cierto tabata hopi bon. E tema di e scol completo ta Naturaleza y e maestra a sali den cura di scol pa laga e alumnonan mira e matanan den cura. Tambe e maestra a haci proef cu nan pa nan planta boonchi.

Diabierna tabata nos ultimo dia na e scol. Nos a stage den un grupo 8. Nan ta preparando pa nan gecoordineerde proefwerken. E alumnonan a haya un les di "Global Warming" y despues nan mester a traha den grupo riba un cartolina y pone e motibonan, e consecuencianan y e medidanan di "Global Warming". E les a termina cu un tremendo rima di e methodo "Papiamento nos idioma" caminda e maestra a lesa e prome frase di e tremendo rima "Sushou" y e klas completo ta ripiti. Despues cada grupo a haya e oportunidad pa lesa e rima y uno ta percura pa e musica riba e bom di un "emmer".

E scol aki tin Ensenansa di Fundeshi pero adapta na nan manera. Den grupo 3 nan ta haya Papiamento como idioma di instruccion. Nos a mira den grupo 5 tambe cu e idioma di instruccion ta Papiamento.

E siman aki banda di a stage nos a sigi un college di Sr. Alwin Maduro unda nos como grupo a sera conoci cu tipo di comportacion (gedragstype) di otro. E ta hopi importante como grupo pa nos sa e esaki pa asina nos por tene cuenta cu otro.

E siman cu ta bini tambe ta mustra di ta bai ta interesante. Keda pendiente.