Nos di tres y ultimo siman na Curacao.

Kico tur nos a haci e siman aki?

Diadomingo mainta 7.30 nos a sali den “nos” van rumbo Banda Bou pa Christoffelpark. Sinta patras den baki di un pick-up double cab, nos a sali cu nos tour guide na stuur pa un tour den Christoffelpark. E parke ta bunita y nos a haña splicacion na tur e partinan di e parke cu e nos a para. Nos tabatin oportunidad di wak un bina cu a cruza nos dilanti den e parke. For di e parke bo tin lugarnan unda bo tin bista masha bunita riba e naturaleza.

Despues nos a haña un splicacion extenso di e landhuis Savonet y nos por a tira un bista paden.

Dialuna y diamars Yulan cu ami a stage na Dr. Albert Schweitzer School. E scol aki ta pertenece na e VPCO (Vereniging Protestante Christelijke Scholen) situa na Salinja. E ta un di e 4 scolnan cu a keda cu idioma di instruccion Hulandes. E alumnonan mester haña Papiamento den grupo 6, pero nan no tin maestro pa duna Papiamento.

Mescos cu na Berg Carmel College, aki tambe nos a pasa den diferente grupo pero e biaha aki parti den prome cu pauze y despues di pauze. Nos por a stage den grupo 3, grupo 5, grupo 6 y grupo 8. Locual cu nos por a mira di Enseñansa di Fundeshi na e scol aki ta den grupo 3 e mesanan rondo cu ta ser jama centro caminda e alumnonan por haci diferente actividad. Den grupo 6 nos a topa cu e mesa di instruccion caminda e maestro ta sinta cu algun alumno su dilanti pa duna instruccion. Tambe nos a mira cu den matematica nan ta traha segun e nivel di e alumno. .

Mi a keda impresiona di un les di ICT cu e maestro di ICT a duna e alumnonan di grupo 6 (4de klas). Nos por papia aki di un les integra tanto di ICT, idioma, matematica y geografia. Despues di a duna e alumnonan instruccion di “coördinaten” e alumnonan mester a bai cu nan auto na cierto lugarnan cu ta aparece riba e pantaya pero siguiendo e instruccionan y hacienda uso di matematica y geografia.

E alumnonan ta haña 35 minut di les y e ultimo 10 minutnan nan por hunga weganan cu nan ta desea.

Enseñansa di Fundeshi ainda no a drenta den grupo 8. E alumnonan ta haña les na e manera tradicional y nan ta sinta den rij tras di otro. Loke cu a resalta cu den e grupo 8 tanto na Berg Carmel College y aki, nan ta preparando pa e gecoördineerde proefwerken cu lo tuma lugar na mei.

Diaranson nos a bai den dos grupo pa bishita un schakelklas. Schakelklas ta un klas na un scol den un regio pa muchanan local cu no tin e abilidadnan pa bai scol avansa y cu tin biaha tin problema di comportacion. E alumnonan aki di klas 4 y 5 ta ser poni den un klas special na un scol basico unda nan ta haña guia intensivo pa por judanan pa por sigi pa enseñansa avanza. E klasnan no tin mas cu 16 alumno. Yulan, Natalie, Gisela y ami a bai bishita e schakelklas di Colegio Mons. Julio Henriquez na Fuik y e otro grupo a bishita e schakelklas di Prinses Margrietschool.

Nos a sigi un les di “Webing” (woordspin) di idioma cu e maestro a duna di “Teksto”. E la trata tanto e “spelling” y e “ontleden en benoemen” via di e webing na un manera cu tur alumno por comprende. E ta haci e alumno e pregunta na Papiamento y ta skirbi tur e contestanan na Hulandes riba borchi. E manera con e maestra ta aserca y haci pregunta na e alumnonan a hala mi atencion. Tur alumno ta participa sea di nan mes of na a ser aserca dor di e maestra.

E idea aki di schakelklas nos lo por use sigur na Aruba y asina evita cu e alumnonan aki ta keda atras o ta ser manda scol special.

Aparte di stage nos a volg riba diaranson merdia tambe un college di Sharella Martis di LOFO.

Diahuebs nos por a bishita St. Joris College y diabierna Albertus College. St Joris College ta un scol caminda nan ta inova cu ICT. E scol ta haci uso di “interactive whiteboard” o tambe jama “Digibord”.

E scolnan aki ta e scolnan caminda bo ta wak casi tur e aspectonan di Enseñansa di Fundeshi. Nos por a pasa den tur e clasnan tira un bista con e ta bai. Mi ta haña lastima cu nos no por a sinta den un di e clasnan aki y observa con e dunamento di les ta bai.

Esaki ta nos ultimo week-end na Curaçao. Nos lo haña falta di e cuminda dushi di Campus. Dialuna merdia nos ta sali pa Bonaire . Ya tur e maletanan ta prepara caba. Nos ta bai cu kilonan extra tanto den e maleta como na e curpa. E “countdown” a cuminsa tambe. Prome tabata den siman, aworaki ta dia y un djis aki ta ora.

Cuida curpa. Lo mi lagabo sa kico tur nos lo haci na Bonaire. Te awe ainda pa nos e ta un sorpresa!!!!